Trafiku i organeve, pr/ligji miratohet në parim në Komisionin e Ligjeve.

Nga Dinejda
Shkruar ne 07 Maj 2012 ora 11:17am

TIRANE - Komisioni i ligjeve miratoi në parim pr/ligjin që synon të lejojë grupin hetimor të EULEX-it për të hetuar në Shqipëri, lidhur me akuzat e ish-senatorit Dick Marty, për trafik organesh në vendin tonë.

Deputetët e opozitës në Komision e cilësuan ligjin si mjaft të rëndësishëm, por kërkuan kohë për miratimin e tij. Sipas deputetit socialist Fatmir Xhafaj, ligji nuk duhet të miratohet me nxitim, pa marrë mendimin e EURALIUS dhe të Prokurorisë. Megjithatë deputetët e PS ranë dakord ta miratojnë parimisht draftin.

Ndërkohë, ministri i Drejtësisë Eduard Halimi theksoi se drafti i propozuar nga mazhoranca është marrë në dorë nga EULEX-i dhe është pjesë e marrëveshjes së Stabilizim Asociimit.

“Ka tre modele që EULEX heton me Task Force. Hetime të përbashkëta bëhen në të gjithë botën, kemi edhe me Italinë për luftën ndaj krimit të organizuar. EULEX do të hetojë cdo akuzë, ndaj ne se kemi specifikuar në titull të ligjit.”- deklaroi ministri Halimi.

Komisioni i Ligjeve pritet të diskutojë të martën pr/ligjin nen për nen.

Në mbledhjen e Komisionit të Ligjeve pati debate mes deputetit socilist Pandeli Majko dhe ministrit të Mjedisit, Fatmir Mediu, i cili deklaroi se pr/ligji për hetimet e EULEX-it ka nevojë per përmirësime. Deputeti Majko theksoi se është e papranueshme që dy ministra të kenë qëndrime të ndryshme për këtë çështje.

“Jo kushtetuese, dy ministra japin qëndrime të ndryshme. Mediu propozimet t’i bënte në Qeveri jo në Komision. Nëse Mediu nuk pranon propozimin e Qeverisë, të dorëhiqet.”-deklaroi Majko.

TRAFIKU I ORGANEVE, BERISHA: LIGJ SPECIAL PËR HETIMIN
Pr/ligji për hetimin e pretendimeve të ish-senatorit zviceran u miratua nga Këshilli i Ministrave të mërkurën e kaluar. Kryeministri Berisha theksoi se ky ligj do të bëjë të mundur një hetim të plotë të akuzave të ngritura nga Dick Marty.

“Kemi shprehur konsideratat tona për këtë raport. Del se në masën dërrmuese është shkruar nga Vukçeviç, por ndjeshmëria e akuzave të pafaktuara tërësisht kërkon hetim të plotë dhe të hollësishëm si për transplantin e organeve si formë e shëmtuar krimi, ashtu edhe për varreza masive të serbëve në Shqipëri”, u shpreh kryeministri.

Shefi i qeverisë u shpreh i bindur se raporti i hartuar nga zvicerani ka qëllime antishqiptare, pasi siç tha ai, hartuesi implikon në titull udhëheqjen politike të Kosovës dhe e mohon vetë në përmbajtje.